Jutro je nježno, osjetljivo, prag između sna i stvarnosti. Način na koji ga pređemo nekako odredi ton koji dajemo cijelom danu. Zato i ovu rubriku pišemo tako da bude topla, s poštovanjem i ljubavlju prema gradu i ljudima. Naše dobro jutro znači drago nam je da ste tu, baš svi. Dan koji tek počinje da diše pokušavamo da obojimo mirom i bliskošću, kasnije dodajemo sve što on donosi, računajući i probleme i propuste. Tako nam se čini razumnije, jer malo topline uvijek dobro dođe i napravi razliku… Grad naravno ne možemo smjestiti u oblutak, ali neki nama važan kamenčić postane nekad čuvar uspomena na more, mirise, zvukove, ljude, jedno vrijeme i nas u njemu. Postane mnogo više od onoga što očima vidimo, postane ono što osjećamo srcem, iskreno i duboko.
Dobro jutro, Herceg Novi!
