U okviru Međunarodnog festivala Danima muzike večeras će se publici u dvorani Park predstaviti pijanista Konstantin Bogino i sopranistkinja Miomira Vitas. Na programu su djela Čajkovskog, Rahmanjinova, Tajfera, Debisija. Početak je u 21.30 časova.
Konstantin Bogino jedan je od najvećih kamernih pijanista današnjice. Prvi učitelj bio mu je Georgi Bogino, njegov otac, pijanista i pedagog, tvorac specijalne pijanističke metode i autor mnogih tekstova o muzici. Konstantin je bio učenik u Centralnoj muzičkoj školi u Moskvi, prepoznatoj u cijelom svijetu po tome što su je pohađali najveći talenti Sovjetskog Saveza. Diplomirao je sa najvišim ocjenama na Konzervatorijumu Čajkovski, u klasi Vere Gornostaeve. Uz master klasove u vodećim konzervatorijumina na svijetu, pedagoški rad na prestižnim muzičkim akademijama i univerzitetima, trenutno predaje na Međunarodnoj akademiji Chioggia, u Helsinkiju i Rimu, gdje takođe ima funkciju umjetničkog direktora. Osnivač je brojnih festivala kamerne muzike. Umjetnička saradnja sa Miomirom Vitas datira iz Moskve, od 1977. godine.
Miomira Vitas završila je solo pjevanje na Akademiji u Sarajevu u klasi jednog od najznačajnijih svijetskih pedagoga Brune Špiler, iz Herceg Novog. Od tada do danas nastupala je na koncertnim podijumima širom Evrope i Azije. Dobitnik je brojnih međunarodnih i domaćih priznanja i nagrada, a mnogi kompozitori napisali su svoja djela inspirisani glasom Miomire Vitas. Tokom karijere se bavila i operskom režijom. Srpsku vokalnu i kamernu muziku i djela jugoslovenskih kompozitora predstavljala je širom svijeta, od Kazahstana do Amerike. Koautorka je muzičko-dokumentarnog filma „Geometrija prijateljstva“ (2022) posvećen Žorž Sand, Klari Šuman, Polini Viardo.
Pokrovitelji Dana muzike su Opština Herceg Novi i Ministarstvo kulture i medija Crne Gore, izvršni producent JUK Herceg fest, a tradicionalni sponzori su Turistička organizacija HN, hotel Sun Resort, Institut „Dr Simo Milošević“.
