Bućari Meljina gostuju sutra ekipi Palme na zogovima u Donjoj Lastvi u trećem kolu Prvenstva Crne Gore. Tivćani nakon velike pobjede protiv Maina u Budvi žele da nastave pobjedničku seriju, ekipa iz Meljina gaji šampionske nade ove sezone.
Susret dvije vrhunske, ali podjednake ekipe, najbolje u ovoj sezoni, smatra direktor BK Meljine Rajko Bojanović.
– Domaći teren u bućanju ima ogromnu prednost, tako da ako ne pobijedimo, nista strašno, ali ako ostvarimo pobjedu, to je onda velika stvar za nas. U svaku utakmicu ulazimo sa željom da pobjedimo. Jednostavno, sa ovakvim sastavom ne možemo drugačije. Ovo su ekipe u kojima igraju osvajači svjetskih i evropskih prvenstava – kazao je on.
Susret u Donjoj Lastvi počeće u 16 sati.
Bućari Vala u ovom kolu dočekuju budvanske Maine.
