Predstava „Uspomene Sare Bernar“, produkcija Herceg Festa i Hercegnovskog pozorišta na turneji je u Kanadi u organizaciji Studija 011.
Nakon brojnih izvođenja u regionu, festivalskih nastupa i nagrada, predstava koja izaziva divljenje publike i maestralna Tanja Bošković, kao Sara Bernar, legendarna glumica koja je dominirala svjetskom scenom skoro pola vijeka i smatrana jednom od najvećih glumica svih vremena, a sa njom Novljanin Dejan Đonović, ništa manje maestralan kao sekretar Žorž Pitu, nepovratno su zaljubljeni u pozorište i ovaj komad i to dokazuju na svakom izvođenju.
Publika u Kanadi predstavu će vidjeti u šest gradova, sutra, u subotu 28. septembra u Torontu, u nedelju u Otavi, zatim nakon pauze u Kičeneru, Vankuveru, Kalgariju i Edmontonu gdje se turneja i završava 6.oktobra.
Ovim gostovanjem u Kanadi hercegnovska pozorišna postavka „Uspomene Sare Bernar“, rađena prema tekstu Džona Marela, jednog od najuspješnijih kanadskih dramskih pisaca, a u režiji Staše Koprivice, približava se jubileju, pedesetom igranju. I producenti i protagonisti predstave zaslužuju čestitke.
