Iako u ovo doba godine svuda miruje vegetacija, kod nas već pupi mimoza a stražu joj, dok se ne rascvjeta, čuvaju razni citrusi – narandže pitome i gorke, mirisni limunovi, mandarine, veliki grejpfruti i sićušne fortunele… Mirišu , uz cimet, na praznike i neka dobra vremena kad su nam bake i majke prigale fritule.
Iz takve atmosfere prirodno se izrodila nostalgična priča o kartolini grada koji je imao nekad najljepši park na Jadranu, o znamenitim ali i nepoznatim ljudima koji su ovdje živjeli i podjednako, svojim djelima i ljubavlju, Herceg Novi činili još ljepšim i boljim. Jedan od njih je i Miloš Miško Marković, agronom u penziji koji je dugo godina u opštini, zajedno sa Antom Sternišom, vodio računa o zelenom fondu grada. Pogledajte emisiju RTHN “More i zaleđe” o slatkim mirisima gorkih narandži koju je pripremila i uredila Slađana Rašo.
